પ્રસ્તાવના:

રાષ્ટ્રીય શિક્ષણ નીતિ – ૨૦૨૦ (NEP-2020)માં શિક્ષણના અનેક પાસાઓમાં સુધારો કરવા માટે ટેક્નોલોજીના ઉપયોગ અને સંકલન પર ભાર મુકવામાં આવ્યો છે. વિદ્યાર્થીઓના એનરોલમેન્ટથી લઈને એમ્પ્લોયમેન્ટ અને એન્ટરપ્રેન્યોરશિપ સુધીની માહિતી મળી રહે તેમજ ડીજીટલ ઇન્ડિયાના ભાગસ્વરૂપે શિક્ષણ ક્ષેત્રે ઇન્ફોર્મેશન અને ટેક્નોલોજીનો મહત્તમ ઉપયોગ કરી તેના માધ્યમથી શિક્ષણના વિવિધ આયામોને સરળ તેમજ પારદર્શક બનાવવાનો છે.

આ માટે રાજ્યની સરકારી યુનિવર્સિટીઓ સંલગ્ન વિવિધ પ્રોગ્રામ્સ અને વિદ્યાશાખાઓમાં પ્રવેશ મેળવવા માગતા વિદ્યાર્થીઓ માટે શિક્ષણ વિભાગ, ઉચ્ચ શિક્ષણ કમિશનરશ્રીની કચેરી, ગાંધીનગર દ્વારા એક સરળ અને સુરક્ષિત એવું ગુજરાત કોમન એડમિશન સર્વિસિસ (GCAS) પોર્ટલ તૈયાર કરી શૈક્ષણિક વર્ષ ૨૦૨૪-૨૫થી તેના મારફત ઉચ્ચ શિક્ષણ કમિશનરશ્રીની કચેરીને હસ્તક સરકારી યુનિવર્સિટીઓની આર્ટ્સ, કોમર્સ, સાયન્સ, શિક્ષણ, કાયદા, વગેરે વિદ્યાશાખાઓ સંલગ્ન સરકારી, બિન-સરકારી અનુદાનિત, ઓટોનોમસ, અને સ્વ-નિર્ભર કૉલેજો તથા સ્નાતક-અનુસ્નાતક ભવનોના સ્નાતક, અનુસ્નાતક, અને પીએચ.ડી. કક્ષાના પ્રોગ્રામ્સમાં પ્રવેશની કાર્યવાહી કરવામાં આવી.

GCAS પોર્ટલના સંચાલન દરમ્યાન વિવિધ યુનિવર્સિટીઓ, શિક્ષણવિદો, સંગઠનો, તથા વિદ્યાર્થીઓ દ્વારા મળેલ સૂચનોને ધ્યાને લઈને સરકારશ્રી દ્વારા આગામી શૈક્ષણિક વર્ષ ૨૦૨૫-૨૬માં પ્રવેશની કાર્યવાહી તમામ માટે વધુ સુગમ, સરળ, અને અસરકારક બને તે માટે શૈક્ષણિક વર્ષ ૨૦૨૪-૨૫ દરમ્યાન ધ્યાને આવેલ મુદ્દાઓ સામે શૈક્ષણિક વર્ષ ૨૦૨૫-૨૬માં પ્રવેશ પ્રક્રિયા વધુ સરળ બનાવતી પ્રસ્તાવિત જોગવાઈઓ આપના સૂચનો માટે નીચે દર્શાવેલ છે. તમામ સંલગ્ન પક્ષોને વિનંતી છે કે તેઓ નીચે દર્શાવેલ મુદ્દાઓ માટે પોતાના સૂચનો અને મંતવ્યો રજૂ કરે, જેથી પ્રવેશ પ્રક્રિયાને વધુ સઘન અને સક્ષમ બનાવવામાં મદદ મળી શકે. આ મુદ્દાઓ પર તમારા સૂચનો દ્વારા આપણે દરેક વિદ્યાર્થી માટે આ પ્રવેશ પ્રક્રિયાને વધુ સરળ બનાવી શકીશું.